اتيكيت الانترفيو

في البداية أحب أقول انهم بيقولوا الانطباع الاول يدوم..وده في الانترفيو مهم جدا...

ندخل على طول في الموضوع..الاتيكيت في الانترفيو..

ده بيبدأ من مكالمة التليفون اللي بنتلقاها من الشركة بتحدد فيها معانا ميعاد الانترفيو,

لازم تتكلم باهتمام مع اللي بيكلمك لأن التقييم بيبدأ من هنا وكمان لازم تكتب العنوان منه حتى لو عارفه عشان ده بيبن انك مهتم أكتر يعني لو مش معاك قلم وورقة ممكن تقول له هتصل بحضرتك كمان شوية أخد العنوان عشان معيش قلم دلوقت..

نيجي ل اللبس...لازم بدلة كاملة وتكون أسود أو رصاصي أو كحلى مفيش ألوان تانية, والقميص أبيض أو لبني, والكرافات لون هادي سادة أو مقلم عادي..الشعر يكون متسرح كلاسيك وميكونش طويل وبلاش الجيل والسبايكي الله يكرمك ...

وبالنسبة للبنات هم طبعا بيفهمو فى الحاجات دى كويس وأدرى بالطرح أو التسريحات...نيجي للانترفيو,

تروح قبل الميعاد بربع أو نص ساعة, تكون جايب معاك قلمك اللي كتير بينسوه وتقول للسكرتير أنا عندي ميعاد الساعة كذة وتسأله عند دكتور مين؟؟ وتأخد أبليكيشن تملاه لو في ...تستنى الانترفيو ومترغيش مع حد بره...تدخل وتخبط الأول وتدخل وتقفل الباب وراك وتقول ازيك يا دكتور كذه,لو هو ماد ايده سلم كويس وانت بتهز أيده, متقعدش ألا لما يقعد هو الأول..اقعد فارد ظهرك ومتشبكش ايدك..أتكلم بثقة و بصوت واضح و

هدوء..ابتسم..استخدم مهارات الاتصال..دايما تبص في عنيه ووجه له الكلام مباشر ولو كذا واحد قاعد وزع الكلام عليهم متركزش على حد واحد..متقاطعهوش وهو بيتكلم ولو حصل قله اسف لو قاطعت حضرتك وكمل...خلصت الانترفيو..وأنت قايم حييه وسلم عليه تاني بالاسم وأخرج وأقفل الباب وراك...أرجو أكون أفدتكم